~ السلام عليكم و رحمه الله و بركاته ~
^
^
^
لي يانا و ياكم خير لفانا و لفاكم و شر تعدانا و تعداكم و السوالف تروح و تجي و مالنا غير الصلاه على النبي يا عاشيقين النبي صلوه عليه
اللهم صلي و سلم عليه
^
^
طبعا كلنا عارفين قصه عقله الاصبع مالا داعي اقصها عليكم
^
^
لكن الي ما تعرفونه ان عقله الاصبع في بيتنا
^
الله يسلمكم اخوي حمودي عمره سنتين و نص عسى الله يخليه ان شاء الله و يحفظه
^
و ما شاء الله عليه كل ما اشوفه اتذكر قصه عقله الاصبع
^
لان قصيرون و مجكلم و حركاته تاخذ القلب ما شاء الله عليه
^
عقله هذا يحب الحيوانات ( اعزكم الله ) في كل انواعها عند الحيوانات شي مميز و لازم يتأملهم
و ما عنده اي مانع ان يجابلهم طول اليوم
^
العابه المفضله طبعا حيوانات (اعزكم الله ) اليفه و متوحشه ما يفرق معاه
و كل ما يشوف حيوان بالتلفزيون يصرخ
^
حماري
جمولي
اسدي
فيلي
^
و هذي حالته كل يوم
^
^
~ كتاكيت عقلتي ~
في يوم من الايام راح ابوي مع عقله سوق الحمام
^
و رد لنا و الفرحه ماليه ويها عساها دوم ان شاء الله
يقول تعالو تعالو شوفو شنو شريت
^
و يمعنا حواليه ( قيادي كلمته تمشي يعني تمشي )
^
تجمعنا حواليه
و كل واحد منا يقول
عقله شنو شريت
^
يرد علينا بصوت الاطفال البريئ
شريت البع كتاكيت ( اي 4 كتاكيت )
ادعم و اسود شوفوا
^
اعتنى فيهم عقله خير اهتمام و حط لهم اكلهم و حازاهم و لعب وياهم و حط لهم ماي
^
و حطهم في الحوش و راح معانا نزور بيت جدي
و يوم ردينا البيت
ركض بسرعه على كتاكيته
^
^
و لا يلاقي ان الشبك مال القفص محفور حفرة كبيرة و اثنين من الكتاكيت مفقودين
^
شان يصرخ منو باق كتاكيتي
^
و ينهم
^
المهم اكتشفنا منو اهو السارق
^
قطوه دخلت القفص و تعشت فيهم و راحت
^
قعدنا نقنعه
عقله القطوه كلتهم
رد علينا
^
ليش منو قالها هذيلا ملوتي مو ملوتها
حرام عليها ليش تاكلهم
ما عندهم ام حراااام
شنو القطوه ما عندها اكل علشان تاكل كتاكيتي
^
و قعد يتحلطم و يتحلطم و دور بالحوش اكثر من مرة يقول ادور كتاكيتي
^
المهم رد حطهم في قفص صغير و كل ما يروح مكان خذاه معاه
يقول علشان القطوه لا تاكلهم
^
و قعد يواسيهم
يقولهم القطوه كلت اخوانكم بس انا هني لا تبجون
^
و حط لهم داخل القفص العابه المفضله
حمار وحشي و زرافه و اسد و فيل
^
و يلقمهم من شبسه الي في ايده
و ينسدح و احط ايده على ويها و سولف معاهم
^
اليوم التالي نزل المطبخ و لا يشوف القطوه منسدحه في الحديقة
^
شان يقول هاذي الي كلت كتاكيتي
شوفيها قاعده هناك
^
و قعد يراقبها و يتأمل حركاتها
و يوم تحركت
^
قام بسرعه و يلم قفص الكتاكيت
يقول خل اخشهم لا تاكلهم
^
عسى الله يحفظك ان شاء الله
^
^
~ بابا عقله ~
^
دايما يراقب عقله ابوي و اخوي العود شلون يحطون القتره على راسهم
^
و قرر ان يصير مثلهم اخذ قتره اخوي و حطها على راسه و قال حق اخوي العود سولي ايها مثل بابا
^
عدلها اخوي له
^
فشاخ شيخ القبيله
^
و غير مشيته قاعد يغلد ابوي
و ثقل صوته و اقول انا بابا
^
المهم ان راح صوب اخوي الثاني الي عمرة 18 سنه
و حط ايده الصغيرة على جتفه و قاله
^
تبيني اوديك الدكان ؟
طبعا الكل ضحك ان هالعقله اهو الي بودي اخوي الدكان مو العكس
^
فرد عليه اي ودني الدكان
عقله : يرفع سبابته اول اصلي بعدين اوديك الدكان زين و يمسح على راس اخوي
^
عايش الدور يحليله
^
طبعا احنا كلنا طحنا بالارض من الضحك و مسكناها على اخوي كل ما نشوفه نقوله روح عقله بوديك الدكان لا تنسى تشتري برد
^
^
عسى الله يحفظه ان شاء الله و يجعله من الذريه الصالحه ان شاء الله كل يوم طالعنا بطلعه جديده مالي حياتنا ابتسامات
اسم الله عليه :)
ردحذففديت الالبع والله ,, كلامه عسل وسوالفه عجيبه
من زمان ما سمعت صوته :)
..
يحب يتقمص شخصيات الكبار
الله يحفظه
السلام عليكم ورحمة الله وبركاته
ردحذفكيـــــفيك أخباريــــــــــك
إن شاء الله منيحـــــــــــــة
يحلوة عقلة اشتقت له
يوم الآي ماكس لا ينسى يا حلوة
أهم شي أنا أقوله كاحمارة وانتِ تعصبين
وأهو يصرخ بنص السينماأبي حمارة
لووووووووووووووول
أحلى شي أبي مسيد عنونو لووووووووووووول
بس بوديك الدكان لوووووووووووووول
خلتني اتشرقد من الضحك بغيت اطيح من كرسيي
هههههههههههههههههههاي
كفو و الله ريال يودي أخوه الكبير الدكان و ما ينسى صلاته
"إلا صلاتي" مال دعاية على قناة العفاسي خخخخخخخخخخخخخخ و اهم شي مسحة الراس فديته حنون
حطيله صورة عفية لو على الأقل من راسه صوب القترة و بس عيونه..كا أنا فاضحة كل عيالنا هههههههههه
سلميلي عليه ووصليله بوستين وحده مني و الثانية من كرماري
*_^
و نسيت أقولج ارقو عن العين حبيبي عسول
ردحذف^_^
السلام عليكم
ردحذفيازينهم الأطفال أموووووت أنا في تفكيرهم وحركاتهم
الله يحفظه لكم يارب ويجعله من الشباب الصالحين اللي ينهضوا بالأمة بإذن الله ...
على فكرة ما أدري شنو قصة عقلة الأصبع أذكره كان فليم كرتون عن أقزام بس ما أذكره منه شيء :)
حزنت على كتاكيته ......أحس انه أنصدم :(
ههههههههههههههه وي ياقلبي عليه الله يحفظه لكم ..والله غمضني على سالفة الكتاكيت وحليله يحاتيهم ..حنون ماشالله عليه ...
ردحذفأما سالفة الدكان عجيييييييبه هههه ربي يخليه لكم ياارب ويكون سند وذخر يارب
تقبلي مرورري ^^
ههههههههه ياحليله
ردحذفالله يحفظه لكم ويجعله من الذريه الصالحه
اسم الله عليه ذكرني باخوي الصغيرون خلودى نفس حركاته
=)
دايم خليه وياك بالتدوينات =)
ماشاء الله عليه الله يحفظه
تقبلي مروري
قياديه طموحه
ردحذفما شاء الله عليه من ناحيه يتقمس الشخصيه يتغمسها صح
مره حاط لفه على راسه و اقول شوفوني انا طموحه عاد كوبي بيست مني و انا صغيرونه لووووول
خاتون
ردحذفو عليكم السلام و رحمه الله و بركاته
انا الحمد الله بخير دامج بخير
بس ولهانه و مشتاقه على قعداتنا و سوالفنا
و منو ينسى يوم المركز العلمي وااااااي من صج استانسنا
بس انتي يننتيني انتي و يا عقله انا اسكت و انتي تشجعين
الله يسلمج المرة اليايه ان شاء الله ايب معاي شيوخ و شوفي الضحك الصجي اهي و عقله مع بعض ياخذون القلب سوالفهم تضحك و لا اذا تهاوشوا لوووووووووووووووول
ان شاء الله بحطله صورة
و راح اوصلهم ان شاء الله سلمي على كوماري
و ان شاء الله الله يحفظه ان رقيه و الله الحامي
ولاء
ردحذفوعليكم السلام و رحمه الله و بركاته
عقله هذا كان ولد بين 7 اولاد طبيعين الا اهو كان صغير بحجم ابهام الايد
من شذي اسمه عقله الاصبع
تسلمين حبيتي
اي زعل مسكين كتاكيته شلون ما يزعل
زٍحَ’ـمةَ حَ’ـڪيّ..||≈
ردحذفتسلمين عسى الله يحفظ لكم خلودي ان شاء الله و كون لكم ذخر ان شاء الله
~أم حرّوبي~
ردحذفتسلمين حبيبتي و خلي لج كل غالي ان شاء الله
رمضان كريم
ردحذفوكل عام وانتم بخير
Aren't kids adorable?
ردحذفThey come with the most unexpected sayings and acts.
الله يحفظهم
آآآ÷ على الجرح يا طموحه قريت البوووست كله
ردحذفأموووووووووووووت بالأطفاااال :**
أحبببهم
الله يحفظه ويخليه (( طبعا احنا أطفالنا كلهم عقله ههههه لأنهم كلهك دقم !! ))
اقصوصه
ردحذفو انتي بخير *_^
Seema*
ردحذفتسلمين *_^
Sen
ردحذفتسلمين
و على فكرة الجيل الجديد كله دقه عسى الله يحظهم ان شاء الله
ما أقول الا الله يحفظه..
ردحذفسوالف اليهال ما تخلص =)
Skon elayl
ردحذفتسلمين
السلام عليكم ورحمة اللة وبركاتة
ردحذفرمضان كريم
اللة يحفطوا ليكي يحفط شقاوة.
مدونتك مرة حلوة اللة يحفطك ويسلمك من كل شر.