تحلطم اليوم

أول النهار صحيت قبل لا يشق النور أمسك كتابي ... يالله هانت بس باقي هاليوم ... اصفح الاوراق مرة و مرتين ... بعدها رن المنبه .

وقت التحدي بلش يالله توكلي على الله ، بخطوات خفيفه انزل من على الدرج ألاقي خواني متجهزين قاعدين على الطاوله يذاكرون قبل

الامتحان ( عسى الله يعينهم ) بديت عليهم بالسلام و بعدها موفقين ان شاء الله و هم يردون بالمثل. رحنا و كل منا قدم امتحانه و الحمد لله

بعدها ردينا البيت و انا كنت حدي متحمسه لاني عطلت و اخيرا عطلت بعد اسابيع من الاختبارات . صادف هالكورس ما تكون فجه بين

اختباراتي من ثاني ميد تيرم لي الفاينل و انا كل اسبوع لازم عندي امتحان لي ما وصلت لي مرحله كرهت فيها الامتحانات و زهقت من

الدراسه بس اليوم حسيت ان التعب كله تبخر ( و لله الحمد و المنه ) المهم بعد ما وصلت البيت على طووول لي الفراش يومين ما نمت الا

ساعتين و يا حلاة نومه الضحى ، بس وين اخواني يخلوني اتهنى فيها و اهم منقهرين اني خلصت امتحاناتي قبلهم

يجيني واحد و را الثاني طموحه يالله قومي بسج نوم ( ما نمت الا 1/2 ساعة حاطين دوبهم دوبي )

و الثاني يجي طموحه يالله بنحط الغداه و انا في ساااااابع نومه بس ما تهنيت تكفخ و تكفخ على بونه بقعدوني ( صج دفاشه )

و بعد ما سلمت امرى الله و قلت ان شاء الله قمت و النومه لي الحين مو راضي تهد عيوني

انزل من الدرج و الاقي الحبايب متجمعين و الغداه ما قضى لي الحين

التفت على المجرم الي قعدني من عز نومي

و اقوله وين الغداة ؟؟؟

يقول اي مو ناطرينج تسوين سلطه و تزهبين السفرة ( ما حلاله الا اليوم )

بعد شسوي اخوي العود و متسلط رحت و امري لله و سويت السلطه و زهبت السفرة مع امي

هم ما حلاله الاخ اتهنى بالاكل كل ساع يقومني

مرة جيبي الملح

و مرة وين الليمون

و لا الثالثه مو حاطه صلصه مثل كل مرة بالسلطه ( واااااااااااااااااااااااي)

بس اخواني الثانين دلي و ملي يطالعوني و هم منقهرين لاني خلصت قبلهم و مستانسين لان الاخ المتسلط كرفني طلبات من اليوم

و بدو يخططون و يتغامزون شلون يطفروني اكثر من جذي ( جني ناقصتهم )

و قعد يقولون يما ليش البنات ما يدخلون معاج المطبخ خلاص كبروا احنا لو مكانج ما ندش المطبخ نخليهم اهم الي يطبخون

و زيدون براس امي الفكرة

و شجعون ابوي على انه يصف معاهم

( مو سالفه اني ما ودي اساعد امي بس امي تحب تطبخ و عندنا خدامتين يعرفون يطبخون بس امي ما تحب لازم اهي الي تدخل المطبخ و ما تحب احد معاها )

الا ان توصلو الا قرار الا و هو ان كل يوم على وحده من البنات

انا وقفت معترضه

توني عطلت

ابي ارتاااح

عطلتي بس 5 ايام ابي اتهنى فيهم

اعفوني من المهمه

و دلي و ملي ما كو يزيدون النار حطب و الاخ الشرير يساعدهم

بس ربي اعاني عليهم و الحمد لله

و قلت ليش ما انتو تطبخون بعد معانا مو تبون تريحون امي خلاص ما عندي مانع ادخل المطبخ بس على شرط انتو هم لكم يوم تطبخون فيه

اعترضوا و اعترضوا و اختمو كلامهم ب الريايل ما يدشون المطبخ !!! ( ما يدخلون يطبخون بس يدخلون اذا يبون يبلعوون شلوون )

الا ان صدر الامر من القاضي باباتي حبيبي و قال طموحه تعفى من الطبخ خلوها تتهنى بعطلتها و الشباب اهم الي عليهم الطبخ

اقعد و ناااسه ( موهاهاهاهاهاها ضحكه شيطانيه )

المهم بعد الحكم الحكيم من باباتي

قالو لا طباخ امي لا يعلى عليه و احنا اذا امي ما طبخت ما ناكل ( عيااااااااارتهم ) شحقه متكلمين بالاصل

صج نشبه

مرات اقعد افكر شنو وظيقة الاخوان غير انهم يطفرون خواتهم بالذات خواني ؟؟؟!!!

احس هوايتهم انعم يطفروني

عطلتي بس 5 ايام و حاطين عينهم عليها

-تقبلو تحلطمي -

على ما اعتقد كل وحده عندها خوان نشبه تتحلطم نفسي

الله يكون بعون كل اخت مثل حالي

دمتم بخير *_^