ابوي العود

يا محلى قعداته و سواليفه حجياته الي يحجيها ، ابوي العود لين يضحك تضحك داخلي احلامي تذكرني بذيج الليالي لين يجمعنا و يحطنا بين اياديه و يبدي يحازينا و احنا نترقب الزوارة لجل نركض نظمه و بعد الظمه نطمع في سواليفه حجياته عن الغوص و السفر و شلون كانوا على قلب واحد كل منهم يساعد الثاني

يبدي يقول زوور بن زرزور و احنا نكمل وراه الي عمره ما جذب و لا حلف زوور ذبح بقة و ترس سبع اجدور و خلا اللحوم و الشحوم على الصواني تدور يا سامعسن صلوا على النبي اللهم صلي و سلم عليه



"كاان يامكان في قديم الزمان ... كان في ملك حكيم يعيش بذيك القرية الفقييرة الي حاشها ذاك الاهوب و يبس كل اراضيها لين ما ضل فيها و لا قطرة ماي الا ذاك الجليب بس ذاك الجليب مسحور كل من يشرب منه يصير مجنون و اهل القرية كلهم يدرون بهالسالفة بس و انا ابوكم العطش ذبح اهل القرية و خلاهم بحيرة نموت من العطش و لا نشرب من ذاك الجليب ، ما اقدرو ينطرون و لا لحظة و لا و اهم مجبلين يركضون و يركضون و الملك يحاول يمنعهم بس وين يمنعهم و اهم شكثرهم و اهو بروحه عاد قاموا و اشربوا ليما ارتوا بعدها صار كلهم مجانين الا الملك الحكيم فقرروا ان يذبحونه لان يختلف عنهم ففكر هالملك و راح يركض بسرعة يشرب من الجليب و صار حال من حال اهل القرية و ظلو يشربون من ذاك الجليب لين ما الله اخذ امانتهم و خلصت ملصت "

كانت حزاوي لنا وايد بس حبيت هذي الحزايه وايد لان كان فعلا ملك حكيم حب اهل قريته و اختار ان يظل معاهم و ما هاجر و راح لبلاد ثانية !!

و احنا نطمع بالحزاوي اكثر و اكثر



فظل يقص علينا و حازينا و علمنا من حجي اول مثل

لاهوب = الحر الشديد

جليب = بئر

ششمه = نظارة

سحتي = البرد القارص

حجي = كلام

عتيج = قديم

زحير = شي ينوكل او ينشرب مو زين

تكفخ = ظرب

لوتي = الي يلعب على الحبلين او بويهين

جمبازي = الشخص المتلاعب غير اهل لثقة

شقردي = الشخص النشيط

متليش= مرهق

طاقته البوهة = الشخص المتعجب

همبة = ثمرة المانجو

عرموط = كمثرى

لغوة = كلام غير نافع

مشبص = ماسك بقوة

الميوا = الفاكه



اييييه و الاساور الي هابين فيها الحين يسونها بالاخيوط يدي كان يعلمنا اياهم من سنين لانهم نفس عقدة الخيوط الي كانو يسونهم احبال للسفينه كانو يتعاونون بشغلهم كله و يحليله يتفنن بعد يسويهم بالكلينكس اذا ما حصل خيوط حواليه عسى الله يبارك في عمرع ان شاء الله







اي يحلات سوالف اول و يحلات عيشتهم صج اني ما عشتها لكني احس بلذتهم و وناستهم لين بقعدون عماتي و يسولفون عن لعبهم بالفريج و الحيله و غناويهم لين يلعبون و شلون يدخلون اي بيت من الفريج كان الفريج عبارة عن بيت واحد كل غرفه امبطله و الكل يقدر يدخل و الكل مأمن على عياله اما الحين كل من صاك بابه علي و ما يدري عن جاره



يازين ذيج الايام و يازين سواليفها اندثرت بدون اسباب اندثرت ذيج الايام و ما بقى منها الا الحجي و السوالف الي تروح و اتي
و تنقال مع الحزاوي صارت مثل قصص الخيال و لا كأنها في يوم من الايام كانت موجوده

كانت الكويت عائلة وحده كل منها يعرف الثاني الحين من نفس العائلة و ما يعرفون بعض

ما نقول الا الله يرحم ذيج الايام