عيدكم مُبارك

~ السلام عليكم و رحمه الله و بركاته ~

عيدكم مُبارك و عساكم من العايدين و الفايزين ان شاء الله 

ليوم العيد نكهته الخاصه نكه تميزه عن باقي الايام 

ترسم على وجيهنا بسمه اول ما نصحا من النوم 

عيدكم مبارك 

تنقل من غرفه لي غرفه 

تبشرنا في يوم العيد 

لحد ينام قومو كلكم اليوم عيد 

اول ما اطلع من غرفتي التفت علي يميني 

و لا عسى ربي يحفظهم 

امي تاج راسي ماسكه المبخر و تبخر البيت 

ابوي عسى ربي لا يحرمني منه يدور من دار لي دار يصحينه من النوم وقول عسى عيدكم يتبارك

اخواني سندي في هالدنيا كل واحد كاشخ بدشداشه العيد 

الي ناسف القترة و كاشخ فيها 

و الي متوهق مو عارف شلون يسويها 

و الي معترض و ما يبي يحطها على راسها يقول ان حطيت القتره محد يعطيني عيدية  لووووووووول

و عقله يطامر بين واحد و الثاني 

وسلامي يفرك ويها توه قاعد من النوم 

ننزل يميع نتيمع على السفره 

ونشوف طاوله الطعام فيها ذاك الفطور السنع 

ذاك الحليب المهيل

و الشاي الحمر الي لين تشوفه تشتهي تشربه 

و طبعا ما يصير عيد بدون الدرابيل 

و قرص العقيلي 

و كورن فليكس بو الديك 

و بو الاسد للشباب 

و الزيتون و الجبن 

و ياحلاه الطماط و الخيار 

مع قرص البيض 

بس ما انسى وجبتي المفضلة للريوق 

توست محمص مدهون في مربى مشمش معاه عصير برتقال 

يمي يمي 

بالاول ابوي 

عيدك مبارك يبا 

الله يبارك فيكم عساكم من العايدين و الفايزين 

دلي: عيدك مبارك يبا 

ابوي: الله يبارك فيك 

ملي: يبا عيدك مبارك 

عساك من العايدين 

ملي: يبا انا قلت لك عيدك مبارك و لا لأ ؟

ابوي : اي قلت 

دلي: و انا يبا قلت ؟

ابوي مو توك عايدت علي 

و انا اطالعهم و اضحك 

خو قولو ا تبون عيديتكم لوووووووووووووووووول 

(دلي : اخوي اصغر مني بسنتين و ملي اخوي الثاني اصغر مني باربع سنين اسميهم دلي وملي لانهم دايم يميع عسى الله يحفظهم ان شاء الله )

بعدها ابوي كالمعتاد 

يالله ترى تاخرنا على بيت خالتي يالله زتكم بسرعه خلصوا 

نعايد على بيت بيت

الشوارع ترحب بالعيد

و الي ما يدري ان اليوم عيد اكيد راح يدري

لين يشوف كل الشباب كاشخين بالدشداشه و القترة و العقال

و اليهال عسى ربي يحفظهم

كل واحد يقول الزين عندي

الي متوهق مو موعارف شنو يسوي بالقترة

و المرتز الكاشخ بالنسفه

رحنا بيت يدي و لا اليهال يتراكضون

عيدكم مبارك و عيدكم مبارك

الي حاط القترة وصاير اماراتي

و الثاني الي حاطيله عقال قطري

بس شيخ الشباب و الله 

 "عقلتي" كويتي

100%

نافش الريش لحد يكلمني انا اليوم صرت بابا مو حمودي 

لووووووووووووووول 

عسى ربي يحفهه ان شاء الله 

و عساكم من العايدين و الفايزين

اتركم في امان الله  *_^

الكويت بريئة منهم

~ السلام عليكم و رحمه الله و بركاته ~ 

انتشر و للاسف الشديد في قناة الوطن في شهر رمضان المبارك المسلسل الكرتوني "بوقتادة و بونبيل" 

و قد اساء هذا المسلسل الى الكويت و الكويتين قبل اسائته للمغرب و قطر 

كما نعلم ان لكل برنامج رسالته الخاصه يرسلها الى جمهور معين حتى يستهدف هدفه بعد ذلك 

ولكن ما هو هدف هذا المسلسل الكرتوني ؟؟

لقد فككَ الوحده الوطنيه و اساء لها و لم يحترم حق الديموقراطيه في طرحه للمواضيع و النقاشات 

فمنذ متى و نحن كذلك ؟؟

كيف يخرج هذا المسلسل الى عالم التلفاز من ارض الكويت ليمثل رأي الكويتين و هم ليس منهم ؟؟ كيف؟؟

هذا المسلسل قد اساء للكويت و لطخ التهم على جدرانها و هي بريئة 

و اساء الى شعب الكويت بشخصياته المتناقضة و شعب الكويت منهم بريئ 

و لم يكتفي بكل هذا بل تجاوز الخطوط الحمراء ليصل الى ما ابعد من ذلك و يسيئ الى جيرتنا العزيزة تحت رايه الكويت و الكويت منهم بريئة 

فما هو هدف هذا المسلسل يا ترى سوى تفكيك الوحده الوطنيه و و تخريب العلاقات بين الكويت و باقي الدول 

الكويت منهم برائة 

و هذا المسلسل لا يمثل رأي الكويتين 

عقله الاصبع

~ السلام عليكم و رحمه الله و بركاته ~

^

^

^

لي يانا و ياكم خير لفانا و لفاكم و شر تعدانا و تعداكم و السوالف تروح و تجي و مالنا غير الصلاه على النبي يا عاشيقين النبي صلوه عليه

اللهم صلي و سلم عليه

^

^

طبعا كلنا عارفين قصه عقله الاصبع مالا داعي اقصها عليكم

^

^

لكن الي ما تعرفونه ان عقله الاصبع في بيتنا

^

الله يسلمكم اخوي حمودي عمره سنتين و نص عسى الله يخليه ان شاء الله و يحفظه

^

و ما شاء الله عليه كل ما اشوفه اتذكر قصه عقله الاصبع

^

لان قصيرون و مجكلم و حركاته تاخذ القلب ما شاء الله عليه

^

عقله هذا يحب الحيوانات ( اعزكم الله ) في كل انواعها عند الحيوانات شي مميز و لازم يتأملهم

و ما عنده اي مانع ان يجابلهم طول اليوم

^

العابه المفضله طبعا حيوانات (اعزكم الله ) اليفه و متوحشه ما يفرق معاه

و كل ما يشوف حيوان بالتلفزيون يصرخ

^

حماري

جمولي

اسدي

فيلي

^

و هذي حالته كل يوم

^

^

~ كتاكيت عقلتي ~

في يوم من الايام راح ابوي مع عقله سوق الحمام

^

و رد لنا و الفرحه ماليه ويها عساها دوم ان شاء الله

يقول تعالو تعالو شوفو شنو شريت

^

و يمعنا حواليه ( قيادي كلمته تمشي يعني تمشي )

^

تجمعنا حواليه

و كل واحد منا يقول

عقله شنو شريت

^

يرد علينا بصوت الاطفال البريئ

شريت البع كتاكيت ( اي 4 كتاكيت )

ادعم و اسود شوفوا

^

اعتنى فيهم عقله خير اهتمام و حط لهم اكلهم و حازاهم و لعب وياهم و حط لهم ماي

^

و حطهم في الحوش و راح معانا نزور بيت جدي

و يوم ردينا البيت

ركض بسرعه على كتاكيته

^

^

و لا يلاقي ان الشبك مال القفص محفور حفرة كبيرة و اثنين من الكتاكيت مفقودين

^

شان يصرخ منو باق كتاكيتي

^

و ينهم

^

المهم اكتشفنا منو اهو السارق

^

قطوه دخلت القفص و تعشت فيهم و راحت

^

قعدنا نقنعه

عقله القطوه كلتهم

رد علينا

^

ليش منو قالها هذيلا ملوتي مو ملوتها

حرام عليها ليش تاكلهم

ما عندهم ام حراااام

شنو القطوه ما عندها اكل علشان تاكل كتاكيتي

^

و قعد يتحلطم و يتحلطم و دور بالحوش اكثر من مرة يقول ادور كتاكيتي

^

المهم رد حطهم في قفص صغير و كل ما يروح مكان خذاه معاه

يقول علشان القطوه لا تاكلهم

^

و قعد يواسيهم

يقولهم القطوه كلت اخوانكم بس انا هني لا تبجون

^

و حط لهم داخل القفص العابه المفضله

حمار وحشي و زرافه و اسد و فيل

^

و يلقمهم من شبسه الي في ايده

و ينسدح و احط ايده على ويها و سولف معاهم

^

اليوم التالي نزل المطبخ و لا يشوف القطوه منسدحه في الحديقة

^

شان يقول هاذي الي كلت كتاكيتي

شوفيها قاعده هناك

^

و قعد يراقبها و يتأمل حركاتها

و يوم تحركت

^

قام بسرعه و يلم قفص الكتاكيت

يقول خل اخشهم لا تاكلهم

^

عسى الله يحفظك ان شاء الله

^

^

~ بابا عقله ~

^

دايما يراقب عقله ابوي و اخوي العود شلون يحطون القتره على راسهم

^

و قرر ان يصير مثلهم اخذ قتره اخوي و حطها على راسه و قال حق اخوي العود سولي ايها مثل بابا

^

عدلها اخوي له

^

فشاخ شيخ القبيله

^

و غير مشيته قاعد يغلد ابوي

و ثقل صوته و اقول انا بابا

^

المهم ان راح صوب اخوي الثاني الي عمرة 18 سنه

و حط ايده الصغيرة على جتفه و قاله

^

تبيني اوديك الدكان ؟

طبعا الكل ضحك ان هالعقله اهو الي بودي اخوي الدكان مو العكس

^

فرد عليه اي ودني الدكان

عقله : يرفع سبابته اول اصلي بعدين اوديك الدكان زين و يمسح على راس اخوي

^

عايش الدور يحليله

^

طبعا احنا كلنا طحنا بالارض من الضحك و مسكناها على اخوي كل ما نشوفه نقوله روح عقله بوديك الدكان لا تنسى تشتري برد

^

^

عسى الله يحفظه ان شاء الله و يجعله من الذريه الصالحه ان شاء الله كل يوم طالعنا بطلعه جديده مالي حياتنا ابتسامات